بخصوص الزواج
تعارف مسبق بين الولد والبنت قبل لايصير شيء رسمي
- زواج تعارف مسبق
- زواج تقليدي
دائما كنت اشوفهم الاثنين نفس الشيء
اللهم الزواج التقليدي العملية حتكون معكوسة
في البداية يجي رسمي يخطب ، بعدين يتعرف عليكي
بينما زواج التعارف المسبق يكلمك قبلها وتتعرفوا على بعض لمدة من الزمن
وبعدها يقرر يكلم اهله ويجي رسمي
يعني في زواج التعارف المسبق يكونوا الطرفين مرتاحين لبعض والغموض انكشف
بينما الزواج التقليدي يكون فيه كمية خوف ومشاعر غير مرغوبة بسبب غموض الطرفين لبعض محد يعرف الثاني محد شاف الثاني بكل الحالات عكس التعارف المسبق
الشيء الي ما احبه في الزواج التقليدي: ادعاء الادب والتفكير الرزين قدام الاهل
يعني قد سمعت قصة لبنت طلبت من امها تتعرف على الشخص الي تقدم لها قبل لايصير العقد
فلكم ان تتخيلوا ان الشخص رفض وقال مو مرتاح لها
وحس انها ممكن تكون قليلة ادب 🙆🏽♀️
ياكبرها عند الله عقل مغلق ، دخول في نية البنت لما طلبت حق من حقوقها قبل لا يقع الفاس في الرأس
بس لانه بيدعي قدام اهله اني ما اسوي هذي الحركات واذا عقدنا نتكلم
يعني بكذا حنصدق ان سنابه وحساباته خاليه من البنات
وهو العكس اكيد طالما دخل في نيتها وشك وخاف منها
هذي من النقاط الي اكرها في الزواج التقليدي ، الطرفين يدّعوا انهم ما يبغوا يكلموا الطرف الثاني قبل العقد
يعنني احنا مالنا في طرق التعارف المنتشرة في جيلنا مع الطرف الثاني
البنت لو رفضت قدام اهلها ممكن اتفهم وجهة نظرها ،لان للاسف في اهل نسال الله السلامة من طريقة تفكيرهم
بس انت كرجل عارف خوف البنت من شخصيتك ومن التجربه بكبرها المفروض تتفهم طلبها وتبطل حركات النفاق والخوف الغير مبرر له
خليني اكون منصفة عرفت قصة معاكسة
البنت طلبت من ابوها بكل شفافية ووضوح والاب كلم الخاطب ووضح له الموضوع والولد بكل ثقة وافق وكلم البنت واتعرفوا على بعض وصاروا احلى اثنين واتزوجوا
يمكن طريقة البنت الاولى الي الولد رفضها كانت عن طريق الحريم فخلى الموضوع غريب للولد !
رغم ماشوف فيها شيء لو ام البنت اتكلمت او ابوها
لان كلنا نعرف اوقات الاب يكون تفكيره منغلق وحيرفض
فالبنت تلجى لامها ويصير الموضوع عن طريق الحريم
ثاني نقطة ماحبها في الزواج التقليدي :عدم اليققين التذبذب بين القبول والرفض
الولد او البنت حكمهم يكون سطحي على الشكل فقط
الولد لو شاف صورتها في الاحوال او الامور الرسمية ممكن لوهله يشك في قراره ويخاف
والبنت لانها ماتعرف شخصيته يصير لها نفس الموضوع
لما مثلا يتكلموا عن جمال اخوه ويقارنواا الشكل
لان الاثنين مابينهم كلام ولاتعارف فيصير في تذبذب بين القبول والرفض
الاثنين كانهم بيحاولوا يمشوا وقبولهم يكون فيه نسبة شك عاليه لان قبولهم سطحي على يوم الشوفة 10 او 5 دقائق من النظر في وجيه بعض
هذااا غير ان اوقات الانسان مايتذكر وجه صاحبه الي يخرج معاه بشكل يومي او درس معاه سنين
بس مجبور يتذكر وجه شريك الحياة الي شافه لمدة 10د او اقل وبناء على هذه النظرة القصيرة حيصير هو شريك الحياة وحتصير هيا كذلك
النقطة الثالثة الي ماحبها في الزواج التقليدي: قصر معلومات اهلنا ، طريقتهم القديمة الغير منطقية
والاعتماد على طرق الاجداد والاسلاف بدون تفكير في مصلحة اولادهم ، عدم تقبلهم لنظرتنا للموضوع وكيف نتمنى يصير
، التفكير المتحجر في النظر للامور
هذي كلها تتجمع وتبان وقت الزواج التقليدي
لو اتفكرنا في الموضوع المفروض يمشي على كيف الطرفين يبغوه يتم
اكيد من حق الاهل انن الموضوع يتم بطريقه دينية مافيها اعتداء على حدود الله ويكونوا هما الموجهين والكلام يتم عن طريقهم بسس لو يتم الموضوع بكيف الطرفين يبغوه يتم ؟
مو حتكون الحياة اسهل !
والدين دايم مع اليسر والسهولة للطرفين بس زي مانعرف شياطين الانس ومدعين التدين هما المشكلة في التخريب
لان اوقات يكون هذا الصنم والشيطان احد افراد اسرتك مع الاسف
في نقطة اخيرة ما احبها في الزواج التقليدي
ذكرتها يمكن بس هنا بذكرها بمنظور مختلف
عدم اليقين الي يكون بين الطرفين المقبلين على الزواج التقليدي ، لما الولد يشوف بنات احلى ينقهر ويزعل
ونفس الشيء للبنت لما تشوف اخوانه او احد احلى من زوجها يصير فيها نفس الشيء
معرف ايش سببه يمكن لانهم مايعرفوا جوهر بعض ؟
لانها نقطة سطحية حقيرة بالنسبة ليا
يعني تخيل يجيني شخص قرر يعف نفسه بالحلال
ويدفع لي مهر بملبغ وقدره ويكون مشتغل على نفسه وبيته وجمع وحاول
واشوفه نظرة مبدئية وارضى فيه
وبكل سطحية اول ما اشوف احد ثاني احس بالدونية اني وافقت على شخص مثلا مو ذاك الشيء
او مو احلى الحلوين
سطحيييييييةةة بشكل مقرف وهذا بسبب عدم التعارف المسبق بين الطرفين
يؤدي الي عدم الرضا والقناعة بما يملكوا ، ماعرف لو انهم الاثنين اتعرفوا على بعض قبل هل حيكون فيه يقين تام وقناعة بالشخص المقابل ولا الموضوع له دخل بجوهر الشخص ومبادئه ؟
تقريباً هذي اكثر الاشياء الي ما احبها في الزواج التقليدي
____________________________________
خلينا ننتقبل للتعارف المسبق بين الطرفين والي يسمى - بالحب -
بالنسبة ليا ما اشوفه حب ، اي نعم اوقات مشاعرنا تغلبنا ونحس بشعور جميل مع الطرف الاخر
بس المشاعر الي على الشاشة ماتعتبر حقيقيه اذا لم تختبر في ارض الواقع
هذا غير يمكن كل الي عرفناه عن بعض في الواقع مانقدر نتعايش معاه ولانتقبله بسبب النظارة الوردية الي لابسينها وقت تعارفنا
عشان كذا احب اسميه تعارف مسبق
نجي الآن وننكش في مسألة التعارف المسبق - الحب -
في وقت من الاوقات حسيت اني اايدها بشروط
زي ان العلاقة من بدايتها تكون رسمية وفيها احترام
يعني الطرفين مايتمادوا بالاضافة الى ان الطرف الثاني يرمي كل اوراقه يقولك كل معلوماته بشكل رسمي
ويبان انه يبغاكِ على سنة الله ورسوله
يعني يقولك وظيفته تخصصه روتينه شخصيته امور كذا
والتعارف مايطول لاكثر من شهرين
شهرين ويتقدم لك او خلينا مانحدده بوقت ، لين الاثنين ماينكشف غموضهم لبعض ويشعروا بالارتياح للخطوة الجاية
لان مايمديني احدد وقت معين خصوصا كل انسان له ظروفه واوقاته الي يكون متاح فيها وهكذا
اكيد ان الاثنين بيكونوا شايفين بعض مانقدر نكذب في هذا الموضوع
لان محا يكون متاكد انه يبغاكِ الا ماكان شافك او طلب يشوفك ، وفي المقابل البنت نفس الشيء
ماعرفف ايش الصح في هذه النقطة لان ما اشوف فيه صح او غلط كل انسان ومبادئه وقيمه وكيف اتربى وكيف يحب يظهر نفسه للطرف الثاني بس الافضل ان البنت ماتتعدى الطرحة والعبايه في انه يشوفها وبرضو هذي فيها اختلاف كثييير وموضوع ثانيييي
بس طالما انك ما تماديتي وماسويتي شيء غلط وتقدري تثقي في الي قدامك - go ahead
الحياة غريبة ومانقدر نرفض التعارف المسبق رفض تام
وهو منتشر في جيلنا
الحياة تتغير وتتجدد حتى طرق الزواج يصير فيها كذا
ولو ان الطريقة هذي كثير بنات يتجنبوها وانا منهم ،
ليش ؟؟؟ لان بكل صراحة وشفافيه جربتها وجاني خوف كبير
ماكنت اشوف ان التجربه تخوف بس انا عايشه عند اهل تقليديين محافظين فالطرق هذي مرعبة بالنسبة لهم
وطبيعي كإنسانة زيي وكبنت بكل بساطة ينتقل لي خوفهم الغير مبرر والمرعب
والي خلاني اكره اي انفتاح عقلي وانفتاح للتجارب الجديدة الي ربي سهلها ليا
فلما جربتها كرهتها ، هذا غير لما جلست اناقش الموضوع مع صحباتي كان كلهم طاغي عليهم الخوف غير المبرر
لان ممكن فيها نسبة تضليل كبيرررةةةةة من ناحية الولد
مايمكن يكذب في كل شيء يمكن متزوج وماقال ويمكن ويمكن ويمكن الكثيييير من اليمكنات المخيفه
فبعد تجربتي وانفتاحي كرهت الموضوع رغم انه تكرر معايا + ماقدر بكل شفافيه اقول لاهلي الحقيقيه
وهذا اكثر شيء مزعج
مزعجج كونك ماتقدر تصارح احد بكل ثقة وتحس انه في احد بيسندك ويخفف عنك يوريك الموضوع من زاوية مختلفه بكل تقبل لمرحلتك ، لتفكيرك بكل سكينة وهدوء
للاسف اهلي كأي اهل تقليديين محافظين مايدعموا انفتاح واندفاع ذريتهم وكيفية تفكيرهم ونظرتهم للامور
هما يحاولوا فهمي ويدعوو انهم فاهميني بس للاسف
ماقد حسيت انهم يفهموني ودايما الاهل الغير منفتحين في قاب كبيرة بيننا وبينهم في التفكير ويمكن ماله دخل انفتاحهم من عدمه بس ماننكر وجود هذا الفراغ بيننا في مسالة التفكير والنظر للامور بطرق مختلفه او طرق جديدة
_____
خرجت عن محور الكلام - النبش في علاقات الحب -
بكمل فكرتي عن زواج التعارف المسبق الي الكل يسميه "حب"
ليش ما اشوفه حب لان من التجارب الي اسمعها حولي
الي يتزوجوا تقليدي أو الي يتزوجوا عن تعارف مسبق على اساس انه حب
اثنينهم يعيشوا نفس التحديات لما الباب يتقفل عليهم
ومقصدي لما يكونوا الاثنين ي بيت واحد
سواء كنت متزوج وحده تعرفها قبل بسنتين او 3
او كنت متزوج وحدة تعرفت عليها فترة الخطوبة والي غالبا تكون من 6 شهور لسنة
في الحالتين مع الاسف حيعيشوا نفس التحديات لو صاروا في بيت واحد
محا يفرق مدة التعرف او طريقته لما تجوا تعيشوا سوا
شخص ماقد عشتي معاه وهو كمان وحدة ماقد عاش معاها حتى لو اتكلمتوا 10 سنين
وما ابالغ !!!!!
لان اعرف قصة لوحدة تحب واحد لمدة 10 سنين واتزوجوا ، للاسف صدمتها كانت كبيرة
كأنها متزوجة تقليدي مافي اي فرق في التعامل
زوجها بيعصب عليها وحابسها وحاسه انها مخنوقه ومن ثاني شهر تبغى ترجع بيت اهلها
طيب والـ10 سنين هذي وهم وكذب ؟ معقول ماكانت تعرفه وتعرف طبيعته !!!!!
وغيرها قصص كثثثثثثير سمعتها
الي يزعل في الموضوع انهم كانوا يحسبوا ان الي بينهم حب ، عشان كذا احب اسميه تعارف مسبق
لان لما اي شخصين يعيشوا مع بعض تختلف المعادلة وتكثر التحديات
وسنين المعرفة الوهمية تتبخر ويجي الوقت الي نشوف
-هل حنقدر نتحمل روتين الحياة الممل مع هذا الشخص؟ ولا لأ
وهنا المغزى من الحياة الزوجية
بالنسبة ليا الحياة الحلوة تكون لما احنا الاثنين كزوجين
نقدر نعيش الحياة المملة بطريقة نحبها
لما نرحم بعض
نساعد بعض
نسند بعض
مانسمع في بعض
اعرف اطباعك وتعرف اطباعي
اتقبل اختلافك عني واتقبل عيوبك الطبيعيه
امشي موضوع موضوعين عشان قدرك عندي اكبر منهم
وانت تتقبل طبيعتي كأنثى وترحم حالي وقت التعب
بكيف نقدر نعيش مع بعض ونبني نظام يريحنا ويخلينا نستمتع بالحياة المملة المفروضة علينا كزوجين
عشان كذا مايفرق الطريقة الي عرفنا فيها بعض هل تقليدي ولا حب
لان لما ينقفل علينا الباب وقتها حنتعرف على بعض
بشكل واقعي بعيداً عن وهم التعارف والبدايات وتلميع الذات والصفات
وفي النهاية هذا هو الطبيعي والمتعارف عليه
انك لما تعيش مع الشخص حتفهمه وتعرفه اكثر من انك تكون تحبه او تعرفه من شاشة الجوال او مكتب الدوام او من اللقاءات البسيطة الي تصير....
______________________________
بكذا افضيت مافي داخلي بخصوص الزواج وكتبت رأيي عن الطريقتين بكل حيادية وانصاف
ومتأثرة بالقصص الي سمعتها حولي ، استقبل نقاشاتكم و اراءكم بصدر رحبببب
⁃ سماهر علي 🐥
تعليقات
إرسال تعليق